|
| 唔寫了, 唔寫了, 以後都唔寫了。
我仲口響響大言不慚要堅持寫xanga, 但原來世事如此難料, 連如此小事一樁都彷彿中注定, 要我領悟到咩叫天無不散之延席; 連生命都有盡頭時, 何況只係區區一些個人既感受。有第一篇entry, 就會有最後一篇entry, 打埋哩篇, 我以後都唔寫xanga, 不論係生活細節也好, 個人感受也好, 我都唔想再講了。
最後一篇。
死亡並唔痛苦, 痛苦的只是身邊留下的人; 死亡卻可怕, 因為無人知道死後是怎樣一回事, 因為不知道, 所以可怕。
離爺爺逝去已快有一個月, 喪禮才剛剛完成不久, 爺爺既離開感覺仍然時刻環繞在心頭, 哭泣, 似乎是我對爺爺思念既唯一途境, 我刻意去想爺爺, 刻意去提醒自己爺爺既離開, 刻意去令自己唔開心, 愈傷心, 我覺得爺爺既存在對我黎講更有價值。今日難得天郎氣清, 我一個人到街上走, 倫敦難以觸摸既冷風又吹到臉上, 身上, 風冷, 心更冷。一路上我垂下頭緩步而行, 細細回想出生以來與爺爺有過既回憶, 除左最常常同爺爺一齊去茶樓飲茶, 我仲記起好多我已遺忘既小事。記憶所及最早只是幼維園時, 仲住係康怡花園, 記得走廊既兩傍, 一邊係廁所, 一邊係爺爺房間, 每一天沖完澡, 就會係廁所板上一跳入爺爺間房, 然後講一句, 爺爺我要喉嚨軟糖! 爺爺就會請我食一粒黑加倫子味既喉糖俾我。唔使返學既日子, 我每次都同爺爺去飲茶, 住康怡既時候, 爺爺會帶我撘電車, 落到筲基灣翠湖酒樓飲茶, 果時仲有好多呀嬸推架點心車叫賣, 唔似而家寫紙落單。燒賣, 牛肉, 叉燒包, 食黎食去都果幾樣點心, 一直到我而家, 放假既日子, 返香港既日子, 我都一路同爺爺飲茶, 由爺爺拖住我去茶樓, 到我賴訓要爺爺去霸位開茶我先慢慢去, 到我拖住要拎拐扙既爺爺一齊去, 到要推坐輪椅既爺爺一齊去, 十數年來爺爺請左我食好多籠燒賣, 牛肉, 叉燒包, 唔使星期日朝早係屋企食多士。
我記得有一次, 中學唔記得幾年級, 開學第一天紅雨警句提早放學, 返到北角時間尚早, 走上茶樓碰碰運氣, 果然見到爺爺飲緊茶, 爺爺見到我突然間黎左好開心, 我記得佢話, 呀爺無咩想, 日日有茶飲, 有人陪我飲下茶就好開心; 我後悔果時仲成日放呀爺飛機, 話去又唔去, 一係老早出左去玩, 一係就賴訓唔願起身, 縱然唔係咩大事, 但留下哩d 遺憾我的確無辦法忘記。慢慢我記起, 好細個時爺爺抱起我, 我鐘意用塊臉擦佢d 鬚根; 慢慢我記起, 小學每日放假爺爺會係校車站黎接我, 然後經過麵包店買個腸仔包俾我; 慢慢我記起, 同朋友落樓下打波, 都會同爺爺講句我去打波呀; 慢慢我記起, 爺爺有一日係屋企跌倒, 半邊臉變左瘀紫色, 後來發覺腦內有瘀血, 做左兩次手術, 從此額頭有兩個凹左既窿窿, 身體就開始變差, 行路要用拐扙, 然後兩枝拐杖, 然後要用四腳架, 再加上柏金遜症, 肌肉硬化得唔能伸直, 最尾哩一年一直都無法自己企起身, 生活好多需要人幫, 呀爸亦要照顧呀爺, 壓力倍增。慢慢, 慢慢, 我記起家姐打電話同我講, 爺爺走左, 我永遠都唔會忘記果日, 三個室友都各自返左學, 我一個人聽住電話, 坐係地下不停不停咁喊, 以為眼淚已經流乾, 悲傷既感覺一下子湧上黎眼淚又再流下。雖然哩一兩年黎我開始有覺得哩一日遲早要黎, 但我每天一想到哩度就逃避去想, 當爺爺真係走了, 我只能夠用好傷心, 好傷心黎形容。
二月九日, 我不會忘記這一天。
慢慢又想起, 好不容易等到返香港奔喪既日子, 果兩日係殯儀館既種種儀式, 每一次望住爺爺既遺照, 見爺爺遺容既心情, 我都無法忘記, 那種既要接受, 卻無可奈何的心情, 發覺原來死亡並不是最傷心處, 而是發現人生是如此無可奈何, 如此孤獨, 又有誰明白我失去我的爺爺既心情? 爺爺既遺容好安詳, 我第一眼見到與我陰腸相隔既爺爺, 縱使我已接受了他的離開, 但一個了無生氣, 只像個公仔既一個爺爺, 實實在在咁衝激我既理性, 果一眼, 我無辦法將淚水強忍下來, 無辦法, 無辦法。第二時再看爺爺, 我冇再喊, 我輕輕咁叫喚, 爺爺, 爺爺, 我仲可以笑住咁係爺爺身邊, 叫佢最後一次。第三次再看爺爺, 爺爺已經入殮, 看佢最後一次遺容, 然後蓋棺火化, 所有子子孫孫都係佢既棺木裡放一枝花, 叫一聲, 安心上路, 果一刻, 我眼裡既一泡眼淚好不容易先無滴下來, 但麻麻, 呀媽, 姑姐, 家姐都哭得聲淚俱下。然後去到火化場既禮堂, 放住爺爺既棺木被推到火化既地方, 堂倌對主家講, 佢走架喇, 佢走架喇, 果一刻, 眼淚終於滴下臉臏, 我再見唔到爺爺既臉容。
縱然我仍可以有講有笑, 可以剎那忘掉悲傷, 但每次我看著鏡子的自己, 我再看不到從前的自己, 因為曾成就我生命的一部份, 已經消失不見一去不返, 現在既自己, 就像沒有了些什麼, 無法成為那曾經快樂的自己, 每次獨自一個, 心頭總是悲傷, 食不知其味, 枕不得其安, 爺爺的離開, 是我生命走到這裡為止, 最傷心最傷心的一個印記。
爺爺, 爺爺, 你在哪裡? 死亡, 把你從我身邊, 從眾多子子孫孫陰陽隔別, 然後又把你帶到那裡去? 把你帶到我夢中說句告別, 一次也好, 好嗎?
| | |
| 聖誕快樂, 新年快樂, 恭喜發財!
可見我既xanga 的確係久違到不知得了, 久違到我都差點以為我經已將哩個xanga 摺埋。一直擱置住打entry, 日子可算只是短短一個月鬆d, 係一個月....兄弟!! 但有感一直逃避對自己生活上, 思索上既一個反省同反映, 哩一個幾月彷彿長得令我慚愧。縱使文筆生疏到落筆尤如大象上樹, 我都希望我可以堅持堅持, 至少打好哩篇文字。
聖唌假期告一段落, 腦海當然又生色不少回憶, 上至踢波下至力王左至食飯右至抽水居中當然係打邊爐; 剎那光輝後又回到321a Fulham Road 同Imperial, 仲交埋coursework, 毅然進入hea 過日晨既中年危機, 哩一個半月, 確實唔係無事發生, 可惜, 我既無頻頻密密寫日記, 更無當時事事感觸既少年情懷, 所以哩個xanga 終於被閣置都無可厚非。
可是文字似乎對我仲有一點吸引力, 仲依然令我有動力去利用文字, 抒發自己, 反省自己, 更係同大家建立溝通既重要渠道, 我相信我繼續寫, 繼續想, 縱然無人睇, 都可以令我作為一個更好既人有所禆益。純綷報導哩個禮拜做左d 乜果d bullshit 唔再提喇, 取而代之係一d 希望我能重拾以前既情懷, 從身邊既人, 事, 自身既感興去得出的一些思考既頭緒。
文字, 請不要跟我絕交, 我還有很多話想說呢。
| | |
| 岩岩今日過左哩個TERM 唯一令人有丁點壓力既math test, 一粒鐘真人show 無source 抄無貓出, 佔全年0.375% 既vector calculas 係以為自己做岩, 返屋企諗返發覺就做錯既情況下, 好無feel 咁完左。下個禮拜交埋份無得抄但唔計分, 同有得抄又計分既功課, 哩個term 就功德圓滿可以返歸。如果我唔give shit 既話聽日就可以走添, 如果我唔give shit 既話, 我連書都唔使讀添 .___.
最近愈黎愈夜訓, 愈夜訓咩? 就愈夜訓。由初初1 點, 變2 點, 變3 點, 家下4 5 6 點先訓都完全唔出奇, 我諗下對上一次早過4 點訓係幾時? 相信大概係盤古初開果期就差唔多。唔淨係我係咁, 我d flatmate 都係咁, hea hea 下就做掌上壓, 做做下就吹下水, 吹吹下就整麵食, 食飽就訓, 訓得都5 點 lol, 第二日我唔使返早, 但係佢地要丫._. 結果當然佢地都係唔返, 逢星期三我要返早果日, 放學返黎佢地都未醒, omg wtf 我地真係唔知做乜 lol
上半年過得快, 下半年過得慢, 就咁就一個term, 就咁就係321A 住左兩個月, 蘇花蘇 good, good 既陸續有來, 都稱得上有點"吓又返得啦"既感覺, 往往係無得走好想走, 有得走想留守, 返到去好好feel, 返返黎勁食蕉。當然好好feel 既原因係巴打們都得閒show 我哩個苦海孤雛, 有得食有得玩有得吹水有得踢波, easter 就次次都冇人理.___. , 所以我都係約定你地班 hihi -
十二月三十一號, 香港花園, 你唔係唔黎下化?
| | |
| 由於xanga 使用率直線下降, 有機會寫我都應該盡量keep 下我經以維特左三年有多既習慣, 始終哩度都記錄住我種種過去既回憶, 就此荒廢著實有點可惜。 先講句tim so 生日快樂先=3= 再臨倫敦不經不覺都個半月, 英倫四子唔計尖子只係區區見得兩次實在係豈有此理, 所以係即興才是王道既宗旨下, 我地用左兩秒就決定翌日七點中國城見見貢。一向準時既我七點三就到左, charlie 七點早到到達完全表現出對見見貢既尊重, 而arthur 就好合理地七點九出現。一輪吹水好快就食完飯, 仲有時間去玩一磅一鋪好抵打既篤波仔, 帶住滿足既心情離開既時候, 我已經發覺我跟緊arthur 返屋企繼續下場見見貢節目。節目一係過對面屋kleung 府上打winning, 節目二係轉game 打gundum, 節目三係返charlie 屋企打麻雀, 節目四係唔知做乜同呀ben 玩msn 同睇facebook gup 女, 節目五係淩晨五點arthur 話頂唔順都係訓覺, 節目六係hea 到六七點同charlie 食麵做早餐, 節目七係早上八時半, 細細聲打字希望唔好打斷charlie 熟睡既呼吸聲, 節目八係趁charlie 訓著埋去嘴啖佢, 因為哩個moment 我feel 到, 朋友真係好, 我真係好鍾意巴打。 嘴左。 最接倫敦天氣毅然轉冷, 回想起AL geography 既智識同時, 不禁感嘆光陰飛逝如梭似箭, 轉眼又快到聖誕。去年除夕, 馬拉松式吹水, 家熙生日既種種景像依然歷久嘗新, 諗起同巴打既快樂回憶, 哩剎那, 我感動喇～～。時時常常都覺得, 上半年過得總係特別慢, 2nd term 單調而intense 既課堂, 3rd term 令人忘我既考試都令我倍感渡日如年; 踏入七月暑假開始, 唔知做過d 乜眨眼間經已進入新學年, 然後就好似而家咁, 才覺得從holiday mood 適應過來, 已經快要回家過聖誕, 然後又係除夕, 又呀熙生日,又乘早機忍耐著呵吹完全為IC 一面。時間, 係唔等人。 上帝, 可唔可以給我多一點時間, 等我更多時間愛我既巴打。 巴打, 可唔可以給我多一點機會, 等我更多機會盡情快樂笑下去。 雖然肉麻, 都不得不講句, 好掛住你地呀!!! 巴打們, 努力讀書! 然後踢波打波片車食飯抽水!!!!!! | | |
| 接近成個月無update, 係最耐既一次, 今日完全的起心肝要寫一寫, 唔係要講新屋, 係因為琛哥, 英導, 當年7b 既roll call prefect, 巴打, 老朋友, charlie lam 二十歲既生日, 巴打生日快樂!!!!! 記得舊年尖尖都有從劍橋哩個神地既舊地落黎, 一齊去china town 大江南北, 重拾英倫四子見見貢既情懷, 今年charlie 黎到轉字頭既心理關口, 尖尖唔知做乜扮忙唔黎支持下 lol 好囉你生日我上黎搵你囉。 一行唔知幾多人食韓國野, 大部都係UCL 既同學, 只佔8.33333 recuring precent 既IC 人, 者係我同heidi 係咩呀, 係唔give shit 身份既介線, 因為我係衷心祝賀好朋友好兄弟好巴打過一個愉快既生日, F.1 就識既巴打, 一齊過黎英國留學生活既巴打, 一齊體活重聚既喜祝既巴打, charlie, 生日快樂! =) 好啦難得update 我都講下我近況, 剛剛返黎果兩日凍到唔敢相信, 不過好快就暖返做正常既倫敦冬天, 不過今日毅然劇痛, 夜晚仲落左一陣雪添.____. , 所以十月飛霜, arthur 就唔覺意凍傷。新屋都finally officially settle down, 連網都上到, 哩云我仲唔發圍怒bt 同上網睇波? 仲可以upload 片仔相仔影下新屋, 詳情就留意多d facebook 啦。 日常既家務對我黎講簡直係手板眼見工夫, 吸塵拖地多數都係我做, 煮飯黎講就放任政策邊個想煮就煮, 結果通常都係我煮, 我煮有個好處, 就係佢地唔使煮, 同埋水準穩定, 無論食雞牛豬都係差唔多味, 同埋無乜味, 炒菜就ricky 經常short gun 黎做不過成日唔記得落鹽, kingchiu 煲飯洗米絕係一絕, 煲到水同米份量剛剛好, clement 就切蒜頭洋蔥同掉垃圾最拿手, 而我就係唔怕俾油彈落鑊炒野果個 lol。 正當以為everytime on track, 間屋開始有d 扭計喇, 先係成個人得兩套鎖匙, 個property manager 唔覆我email, 然後出邊個廁所個浴江唔知做乜, 彷彿同個牆有條隙d 水滲落樓下天花, 被人投訴要fix 好, 但係唔知點fix 同唔知係咪要自己yum 荷包磅水, 跟住ricky 房出邊個露台度門個鎖今日無啦啦kai 左鎖左開唔返, 幾經辛苦開返研究後, 發現家下要拉度門向自己黎鎖, kai kai 地o_O 不過sor far 都住得相當高興, 可以話愈住愈高興 lol, comparatively 都相當靚算係相當滿足, 又有得玩mini basketball, 又有得咬手瓜, 又有得做一齊做body building, 又有得一齊打winning 打warcraft 等等, 附近購物非常方便, 遠少少購物都正常地方便, 仲有十五磅一個月任睇戲既戲院, 唔太差既食肆同比較出名既食肆都有, 除左屋租貴d 外.__. 查實我都無乜push factor 要我搬, 呀媽都無嫌貴, 我無謂嫌細啦 lol, 加油呀英磅, 快d 跌到好似港紙咁啦 xD。 好啦睇相仔啦   
     
最後....用住舊年果張頂住當先啦 lol   食飽, 乜乜乜乜, 訓 !
| | |
|
